અમદાવાદ RTO માં 2022થી 2024 વચ્ચે 2.60 લાખથી વધુ લોકોએ કાર માટે ડ્રાઈવિંગ લાઈસન્સ માટે ટેસ્ટ આપ્યો હતો. આમાં 43,736 લોકો નાપાસ થયા, જેમાં 26,241 મહિલા અને 17,495 પુરુષોનો સમાવેશ થાય છે. આથી સ્પષ્ટ થાય છે કે નાપાસ થનારામાં 60% મહિલાઓ અને 40% પુરુષો છે.
RTO ટેસ્ટમાં નાપાસ થવાના મુખ્ય કારણો
કાર ડ્રાઈવિંગ ટેસ્ટમાં નાપાસ થવાનું મુખ્ય કારણ બોક્સ પાર્કિંગ છે. તેના રિવર્સ પાર્કિંગ અને ઢાળ પર 10 સેકન્ડ સુધી કાર રોકી રાખવાનો નિયમ લોકો માટે પડકારરૂપ છે.
- બોક્સ પાર્કિંગ: મોટાભાગના લોકો નિર્ધારિત સમયમર્યાદામાં પાર્કિંગ પૂર્ણ કરી શકતા નથી.
- સાઈડ પોલને અડવું: કાર સાઈડના પોલને અડી જાય છે, જેના કારણે ફેલ થવું પડે છે.
- ઢાળ પર પડકાર: ઢાળ પર ટેસ્ટ આપતી વખતે મોટાભાગની કાર પાછી સળી જાય છે.
- સમયમર્યાદામાં કામ પૂરું ન કરવું: ઘણા ઉમેદવારો ચારેય ટાસ્ક પૂરા કર્યા વિના બહાર નીકળી જાય છે.
ટેસ્ટમાં અનેક વખત નાપાસ થનારા ઉમેદવારો
નરોડાની યુવતીએ જણાવ્યું કે તેણે ચાર વખત ટેસ્ટ આપ્યો છે, પણ સાઈડ પોલને અડતાં તે નાપાસ થઈ જાય છે. વસ્ત્રાલના યુવાને 6 ટ્રાયલ આપ્યા હોવા છતાં તે પાસ થઈ શક્યો નથી.
પ્રેક્ટિસ વગર લોકો ટેસ્ટ આપવા આવે છે
RTO અધિકારી જે.જે. પટેલનું કહેવું છે કે “ઘણા લોકો પ્રેક્ટિસ કર્યા વગર આવતા હોય છે. YouTube પર વીડિયો જોઈને પ્રેક્ટિસ કરી આવે તો મુશ્કેલી ન પડે. અમે ટેસ્ટની સંખ્યા પર કોઈ મર્યાદા મુકતા નથી.”
RTO માં ભ્રષ્ટાચારના આક્ષેપ
કેટલાક એજન્ટ ઉમેદવારોને પાસ કરાવવા માટે લાંચ લેવાના આરોપો પણ સાંભળવા મળે છે. ટ્રાયલમાં નાપાસ થનારા કેટલાક ઉમેદવારો એજન્ટો પાસેથી મદદ લેવાની મઝબૂરી અનુભવે છે.
ટૂ-વ્હીલર માટે સફળતા વધુ
ટૂ-વ્હીલરના ટેસ્ટમાં 80-90% લોકો પ્રથમ પ્રયાસમાં જ પાસ થઈ જાય છે, જ્યારે કારના ટેસ્ટમાં માત્ર 40% ઉમેદવારો પ્રથમ પ્રયાસમાં સફળ થાય છે.
આંતરિક સિસ્ટમમાં સુધારા અને વધુ માર્ગદર્શિકા આપવામાં આવે તો નાપાસ થવાનો દર ઘટી શકે છે.
