અમદાવાદ: નરોડા જીઆઈડીસી વિસ્તારમાં આવેલી રાહુલ ટ્રેડીંગ કંપનીના શેડ નીચે ખુલ્લામાં તીનપત્તી જુગાર રમતા 9 શખ્સોને નરોડા પોલીસે રંગેહાથ ઝડપી લીધા છે. આ દરોડામાં પોલીસે કુલ 2.82 કરોડના મુદામાલ સાથે 9 મોબાઈલ ફોન, 7 વાહનો અને રોકડ રકમ કબજે કરી છે.
પોલીસને બાતમી મળતાં દરોડો પાડ્યો
નરોડા પોલીસને બાતમી મળી હતી કે ડાયમંડ પાર્ક વિસ્તારમાં આવેલી રાહુલ ટ્રેડીંગ કંપનીના શેડ નીચે કેટલાક શખ્સો તીનપત્તી જુગાર રમી રહ્યા છે. આ બાતમીના આધારે પોલીસે તુરંત કાર્યવાહી કરી અને સ્થળ પર દરોડો પાડ્યો.
9 શખ્સોની ધરપકડ, 2.82 કરોડનો મુદામાલ કબજે
પોલીસે દરોડા દરમિયાન 9 શખ્સોની ધરપકડ કરી છે, જેમાં મનન પટેલ, ગુરુચરણસિંહ મલ્હોત્રા, રાહુલ પટેલ, પરેશ પટેલ, અમિત પટેલ, મોનુ વિગ, ચિંતન પટેલ, હરભજનસિંહ મલ્હોત્રા અને પરવિનસિંહ મલ્હોત્રાનો સમાવેશ થાય છે.
પોલીસે કબજે કરેલો મુદામાલ:
- નગદી: ₹62,260
- 9 મોંઘા મોબાઈલ ફોન: કિંમત ₹15,20,000
- 7 વાહનો (3 લક્ઝરી કાર, 4 ટુ-વ્હીલર): કુલ કિંમત ₹26,15,000
- કુલ મુદામાલ: ₹2,82,92,260
નરોડા પોલીસે ગુનો નોંધી આગળની કાર્યવાહી હાથ ધરી
નરોડા પોલીસે આરોપીઓ વિરુદ્ધ જુગારધારાની કલમો હેઠળ ગુનો નોંધી આગળની તપાસ શરૂ કરી છે. નોંધનીય છે કે આ આરોપીઓ વેપાર અને નોકરી સાથે સંકળાયેલા છે. પોલીસે વધુ તપાસ હાથ ધરી છે કે શું આ ગેંગ અગાઉ પણ આવી કોઈ ગેરકાયદેસર પ્રવૃત્તિમાં સંડોવાઈ છે કે કેમ.
