આઝાદીનો અમૃત મહોત્સવ ઉજવણીના અંતર્ગત ગુજરાત યુનિવર્સિટી દ્વારા એક અનોખી અને ભવ્ય પહેલ કરવામાં આવી રહી છે. 13 ઓગસ્ટે યુનિવર્સિટી 6 કિલોમીટરની તિરંગા યાત્રા નું આયોજન કરી રહી છે, જેમાં માત્ર દેશપ્રેમનો સંદેશ જ નહીં પરંતુ શિક્ષણ ક્ષેત્રમાં એક નવી પહેલ પણ થઈ રહી છે. આ યાત્રામાં જોડાનારા વિદ્યાર્થીઓને તેમની હાજરીના આધારે એકેડેમિક ક્રેડિટ આપવામાં આવશે, જે પ્રથમવાર શિક્ષણ સિવાયની પ્રવૃત્તિ માટે આપવામાં આવી રહી છે.
યુનિવર્સિટીના વાઇસ ચાન્સેલર ડૉ. નિરજા ગુપ્તાએ માહિતી આપતાં જણાવ્યું કે, તિરંગા યાત્રા ‘હર ઘર તિરંગા’ અભિયાનને પ્રોત્સાહન આપશે અને દેશભક્તિની ભાવનાને સમાજમાં વ્યાપક રીતે પ્રસરાવશે. “રાષ્ટ્રીય શિક્ષણ નીતિ (NEP) અમલમાં આવ્યા બાદ ક્રેડિટ સિસ્ટમ શરૂ થઈ છે. તેના અંતર્ગત બિનશૈક્ષણિક પ્રવૃત્તિમાં વિદ્યાર્થીઓની ભાગીદારીને પણ મૂલ્યાંકનનો ભાગ બનાવવામાં આવ્યો છે. આ પહેલથી વિદ્યાર્થીઓમાં સામાજિક જવાબદારી અને રાષ્ટ્રીય ગૌરવની ભાવના મજબૂત થશે,” તેમ વાઇસ ચાન્સેલરે જણાવ્યું.
તિરંગા યાત્રા નો માર્ગ અને સમય
આ યાત્રા 13 ઓગસ્ટે સવારે 10:30 વાગ્યે ગુજરાત યુનિવર્સિટી કેમ્પસથી પ્રારંભ થશે. માર્ગમાં વિજય ચાર રસ્તા, હેલ્મેટ સર્કલ, વસ્ત્રાપુર, માનસી સર્કલ, 132 ફૂટ રિંગ રોડનો સમાવેશ થશે અને અંતે ફરી ગુજરાત યુનિવર્સિટીમાં સમાપન થશે. કુલ અંતર આશરે 6 કિલોમીટરનું રહેશે.
યાત્રામાં યુનિવર્સિટીના બોર્ડ ઓફ મેનેજમેન્ટ અને એક્ઝિક્યુટિવ કાઉન્સિલના સભ્યો, સરકારી પ્રતિનિધિઓ, ભૂતપૂર્વ વિદ્યાર્થીઓ અને સમાજના વિવિધ વર્ગોના પ્રતિનિધિઓ જોડાશે. યુનિવર્સિટીએ સ્પષ્ટ કર્યું છે કે આ કાર્યક્રમમાં જોડાવા ઈચ્છુક કોઈપણ નાગરિકનું હાર્દિક સ્વાગત છે.
વિદ્યાર્થીઓ માટે ખાસ પ્રોત્સાહન
આ તિરંગા યાત્રા માં હાજર રહેલા તમામ વિદ્યાર્થીઓની હાજરી નોંધાશે અને તેના આધારે તેમને એકેડેમિક ક્રેડિટ આપવામાં આવશે. યુનિવર્સિટીના તમામ વિભાગના ડીનને પરિપત્ર દ્વારા સૂચના આપવામાં આવી છે કે તેઓ પોતાની કૉલેજના વિદ્યાર્થીઓને આ કાર્યક્રમમાં સક્રિય રીતે જોડાવા પ્રોત્સાહિત કરે. આ રીતે શિક્ષણ સાથે રાષ્ટ્રીય મૂલ્યોનું સંકલન થવાનું છે.
પ્રથમવાર ક્રેડિટ બિનશૈક્ષણિક પ્રવૃત્તિ માટે
રાષ્ટ્રીય શિક્ષણ નીતિ અનુસાર, વિદ્યાર્થીઓના સર્વાંગી વિકાસને ધ્યાનમાં રાખીને બિનશૈક્ષણિક પ્રવૃત્તિઓને પણ એકેડેમિક મૂલ્યાંકનમાં સ્થાન આપવામાં આવે છે. ગુજરાત યુનિવર્સિટી એ જ દિશામાં આગળ વધીને આ તિરંગા યાત્રા ને ક્રેડિટ સિસ્ટમ સાથે જોડ્યું છે. વાઇસ ચાન્સેલર મુજબ, આ પહેલ વિદ્યાર્થીઓમાં રાષ્ટ્રીય ચેતના, એકતા અને સમાજસેવાના ભાવને મજબૂત બનાવશે.
સામાજિક ભાગીદારીનો સંદેશ
કાર્યક્રમનો મુખ્ય ઉદ્દેશ્ય માત્ર એક પરંપરાગત રેલી નહીં પરંતુ ‘હર ઘર તિરંગા’ અભિયાન દ્વારા પ્રત્યેક ઘરમાં તિરંગો ફરકાવવાનો સંદેશ આપવાનો છે. યુનિવર્સિટીએ જણાવ્યું છે કે, આવા કાર્યક્રમોમાં સમાજના તમામ વર્ગોની સક્રિય ભાગીદારી જરૂરી છે જેથી યુવા પેઢીમાં દેશ માટે ગૌરવ અને એકતા પ્રત્યેની ભાવના વધુ પ્રબળ બને.
આ તિરંગા યાત્રા દ્વારા ગુજરાત યુનિવર્સિટી માત્ર રાષ્ટ્રપ્રેમનો સંદેશ આપશે નહીં, પરંતુ રાષ્ટ્રીય શિક્ષણ નીતિ હેઠળ શિક્ષણ ક્ષેત્રમાં એક નવી દિશા આપશે — જ્યાં પુસ્તકોથી બહાર આવીને જીવનમૂલ્યો અને રાષ્ટ્રીય મૂલ્યોનું શિક્ષણ પણ શૈક્ષણિક મૂલ્યાંકનનો એક અગત્યનો ભાગ બનશે.
વધુ સમાચાર વાંચો :
શનિ જયંતિ 2025: જાણો 26 કે 27 મેમાં શું છે સાચી તારીખ, પૂજા મુહૂર્ત અને વિશેષ મહિમા
https://abplusnews.com/when-is-shani-jayanti-in-2025/
